भोटेकोशी बाढी प्रभावित क्षेत्रका क्षतिग्रस्त सडक सञ्जाल आगामी असोजभित्रै सञ्चालनमा ल्याइने भएको छ। प्रधानमन्त्री तथा मन्त्रिपरिषद्को कार्यालयमा आज भएको छलफलमा पूर्वाधार विकासमन्त्री सुनिल लम्सालले यस्तो जानकारी दिए।
मन्त्री लम्सालले आठवटा कार्यदल गठन गरी सडक र पुल निर्माणलाई गति दिइएको बताए। उनले पूर्वाधार पुनर्निर्माणमा दोहोरोपना रोक्न स्थानीय जनप्रतिनिधिको सहयोग मागे। तत्काल वैकल्पिक सडक सञ्चालन र तुइन तथा झोलुङ्गे पुल जडानलाई तीव्रता दिइएको छ। पक्की सडक र पुल निर्माण छिटो सम्पन्न गर्ने लक्ष्य छ।
उनले काठमाडौंमै बसेर मन्त्रालयका निकाय प्रमुखसँग समन्वय गर्न आग्रह गरे। स्थानीय जनप्रतिनिधिलाई क्षतिग्रस्त पूर्वाधारको विवरण दिन, योजना निर्माण सहजीकरण गर्न र निर्माण कार्यको समन्वय, अनुगमन तथा नियमनमा सहयोग गर्न भने।
‘प्रभावित क्षेत्रमा आगामी मङ्सिरसम्म खानेपानी प्रणाली पुनःस्थापना गरिनेछ,’ मन्त्री लम्सालले भने, ‘स्वास्थ्य र शिक्षा पूर्वाधार निर्माणमा पनि सरकारले काम गरिरहेको छ।’
नुवाकोटका प्रतिनिधिसभा सदस्य एवं सूचना तथा सञ्चारमन्त्री विक्रम तिमिल्सिनाले गैरसरकारी संस्थाले बाढी प्रभावितलाई घर बनाइदिने जस्ता आश्वासन दिएकोप्रति ध्यानाकर्षण गराए। उनले राष्ट्रिय विपद् जोखिम न्यूनीकरण तथा व्यवस्थापन प्राधिकरणसँगको समन्वयमा मात्र काम गर्नुपर्ने बताए। पीडित नछुट्ने गरी तथ्याङ्क सङ्कलन गरी सरकारलाई उपलब्ध गराउन पनि उनले आग्रह गरे।
