दाङको राजपुर गाउँपालिका–२, खालगैरामा छिमेकी रुपलाल चौधरी (गोमे) को शरीरमा पेट्रोल छर्केर आगो लगाएको आरोपमा ३९ वर्षीय त्रिलोक सिंह कार्कीलाई प्रहरीले पक्राउ गरेको छ। जिल्ला प्रहरी कार्यालय दाङले राजपुर गाउँपालिका–२, मटेरियाका कार्कीलाई लमहीबाट नियन्त्रणमा लिएको हो।
जिल्ला प्रहरी कार्यालय दाङका प्रहरी निरीक्षक श्रीकुमार पौडेलका अनुसार, वडा प्रहरी कार्यालय लमहीबाट खटिएको टोलीले कार्कीलाई पक्राउ गरेको हो। छिमेकीमाथि पेट्रोल छर्केर आगो लगाई हत्याको प्रयास गरेको आरोप त्रिलोक सिंह कार्कीमाथि लागेको छ।
घटनाको विवरण
त्रिलोक सिंह कार्कीले गत कात्तिक २८ गते दिउँसो करिब २ः२० बजे राजपुर गाउँपालिका–२ मा पर्ने खालगैराको खेल मैदानमा मोटरसाइकलबाट पेट्रोल निकालेर करिब ४८ वर्षीय रुपलाल चौधरी (गोमे) को शरीरमा छर्केर आगो लगाएका थिए। प्रहरीका अनुसार, मादक पदार्थ सेवन गरेका कार्की र चौधरीबीच आपसी विवादका कारण झगडा भएको थियो।
आगो लागेर बलुवा डाँडाका चौधरी गम्भीर घाइते भएका छन्। उनलाई थप उपचारका लागि जिल्ला बाहिर लगिएको प्रहरीले जनाएको छ। घटनालगत्तै कार्की फरार भएका थिए।
थप अनुसन्धान जारी
प्रहरी निरीक्षक पौडेलले घटनाबारे थप अनुसन्धान भइरहेको बताएका छन्।
