शनिबार र आइतबारको भारी वर्षाका कारण अवरुद्ध बनेको बिपी राजमार्ग सञ्चालनमा ल्याउने प्रयास जारी छ। सडक डिभिजन कार्यालय भक्तपुरलगायतका निकायले राजमार्ग खुलाउनका लागि काम गरिरहेका छन्।
आइतबार बाटो खुलाउने प्रयास गर्दागर्दै पुनः वर्षा भएपछि सम्भावित जोखिमलाई मध्यनजर गर्दै काम रोकिएको थियो। कार्यालयका प्रमुख सिनियर डिभिजनल इन्जिनियर सुमन योगेशले सोमबार बिहानदेखि डाइभर्सनको कामलाई निरन्तरता दिइएको जानकारी दिए।
चारसयबेसी बाहेकका स्थानमा सडक खुलाउने प्रयास भइरहेको छ। वर्षाले सडकमा पहिरो र लेदो झरेपछि यातायात पूर्ण रूपमा ठप्प भएको छ।
सोमबार बिहान १० बजेसम्म राजमार्ग सञ्चालनमा ल्याउने तयारी रहेको बताइएको छ। यद्यपि, मौसमको अवस्था र थप अवरोध आएमा सञ्चालनमा ढिलाइ हुन सक्नेछ।