श्रममन्त्री रामजी यादवको सचिवालयका मुस्तकिम मियाँ अपहरण तथा शरीर बन्धक कसुरमा पक्राउ परेका छन्। उनलाई २०८२ फागुन १४ मा राजु कुमार चौधरीलाई अपहरण गरी लुटपाट र कुटपिट गरेको आरोप छ।
सप्तरीको महादेवा गाउँपालिका-१ बल्थी घर भई हाल राजविराज-३ बस्ने २७ वर्षीय मियाँलाई प्रहरीले सोमबार राजविराजबाट पक्राउ गरेको हो। सप्तरीका एसपी गौतम केसीका अनुसार, जिल्ला अदालतले वैशाख २४ मा पक्राउ पुर्जी जारी गरेपछि उनलाई नियन्त्रणमा लिइएको थियो।
पीडितको किटानी जाहेरी अनुसार, मियाँसहितको समूहले २०८२ फागुन १४ गते बिहान ८ बजे राजविराज नगरपालिका वडा नम्बर–३ हनुमान चोकबाट राजु कुमार चौधरीलाई अपहरण गरेको थियो। दुईवटा मोटरसाइकलमा आएका उनीहरूले बन्दुक देखाएर चौधरीलाई कब्जामा लिएका थिए।
अपहरणपछि चौधरीलाई राजविराज नगरपालिका–८ स्थित हिमालय राईस मिलको पछाडि पर्वत भन्ने स्थानको सुनसान खाली चौरमा लगेर बन्धक बनाई कुटपिट गरिएको थियो। पीडितले प्रहरीलाई दिएको बयान अनुसार, उनीहरूले धम्की दिँदै भुईँमा थुकेर चाट्न लगाएका थिए।
अपहरणकारी समूहले चौधरीको मोबाइल, २ तोला सुनको सिक्री र नगद १ लाख ३० हजार लुटेको थियो। उनीहरूले चौधरीलाई नाङ्गै पारेर भिडियो समेत बनाई यातना दिएको पीडितको जाहेरीमा उल्लेख छ। अपहरणमा संलग्न अरू तीन जना भने अझै फरार छन्।
मियाँ विरुद्ध अपहरण वा शरीर बन्धक र अपमानजनक, अमानवीय व्यवहार सम्बन्धी कसुरमा जाहेरी दर्ता भएको छ। सप्तरीका प्रहरी प्रवक्ता प्रहरी नायब उपरीक्षक डम्बरबहादुर पुरीले अनुसन्धान भइरहेको जानकारी दिए। अदालतले उनलाई सात दिनको म्याद थप गरी अनुसन्धान अगाडि बढाएको छ।
मुस्तकिम मियाँ २०८२ चैत २७ मा श्रम, रोजगार तथा सामाजिक सुरक्षा मन्त्री रामजी यादवको स्वकीय सचिवालयको हलुका सवारी चालक पदमा नियुक्त भएको भेटिएको छ।
यसबाहेक, मियाँ थप दुईवटा मुद्दामा पनि फरार सूचीमा थिए। उनीमाथि विद्युतीय अपराध सम्बन्धी कसुर र अर्का एक युवकलाई नाङ्गै बनाएर कुटपिट गरेको आरोपमा पनि अनुसन्धान जारी रहेको प्रहरीले बताएको छ।
