सुनकोशी नदीमा पानीको बहाव बढेपछि खोटाङको पूर्वी तराईसँगको सीधा यातायात सम्पर्क विच्छेद भएको छ। फोक्सिङटार र बङ्शिलाघाटका दुई अस्थायी बेलिब्रिज हटाइएपछि यो अवस्था आएको हो।
पूर्वाधार विकास कार्यालय खोटाङका प्रमुख बिनम दाहालका अनुसार, बङ्शिलाघाटको बेलिब्रिज गत वैशाख २७ गतेबाट निकाल्न थालिएको थियो। यो बेलिब्रिज खोटाङको बराहपोखरी गाउँपालिका-५ पौवासेरा र उदयपुरको चौदण्डीगढी नगरपालिका-१ जोड्ने सुनकोशीमा पहिलोपटक जडान गरिएको थियो।
बङ्शिलाघाटको अस्थायी बेलिब्रिज हटाएपछि अब करिब छ महिनासम्म झोलुङ्गे पुलमार्फत पूर्वी तराईका जिल्ला आवतजावत गर्नुपर्ने बाध्यता दोहोरिएको स्थानीय युवराज मगरले बताए। यसले खोटाङका जन्तेढुङ्गा, बराहपोखरी र खोटेहाङ गाउँपालिका तथा भोजपुरका केही गाउँका नागरिकलाई सुविधा दिएको थियो।
बङ्शिलाघाटमा मोटरेबल पक्की पुल निर्माणका लागि कालिका-वेदांसी जेभीले २०७९ मंसिर १ मा सम्झौता गर्यो। स्थानीयले निर्माण कम्पनीको ढिलासुस्ती भएको आरोप लगाएका छन्। अस्थायी बेलिब्रिजका सामग्री खरिदमा कोशी प्रदेश सरकारले १ करोड ८७ लाख रुपैयाँ विनियोजन गरेको थियो।
गाईघाट दिक्तेल सडक योजना कार्यालयका सूचना अधिकारी इन्जिनियर सुमन गोलेले फोक्सिङटारको अस्थायी बेलिब्रिज जेठ ३ गतेबाट निकाल्न सुरु गरिएको जानकारी दिएका छन्। सगरमाथा लोकमार्गमा पर्ने दिक्तेल-गाईघाट सडकखण्डको सुनकोशीस्थित यो बेलिब्रिज गत पुस २७ गतेबाट सञ्चालनमा आएको थियो।
खोटाङको खोटेहाङ गाउँपालिका-९, लिच्कीराम्चे र उदयपुरको रौतामाई गाउँपालिका-५, आँपटार जोड्ने फोक्सिङटारको मोटरेबल पुल गत वर्ष असोज १२ गतेको बाढीले बगाएको थियो। निर्माण सम्पन्न भएर सञ्चालनमा आएको वर्ष दिन नपुग्दै पुल बगाएपछि फेरि अस्थायी बेलिब्रिजको भर पर्नुपरेको थियो।
उद्योग वाणिज्य सङ्घ खोटाङका अध्यक्ष राजनप्रसाद आचार्यले फोक्सिङटारको अस्थायी बेलिब्रिज हटाएपछि समस्या बढेको बताएका छन्। पूर्वी तराईबाट खोटाङ भित्रिने यातायातका साधन अब घुर्मी-कटारी हुँदै जयरामघाट तारेर ल्याउनुपर्नेछ। यो खोटाङ्गे जनताका लागि घुमाउरो बाटो हो।
यसले दैनिक उपभोग्य वस्तुको मूल्यसमेत वृद्धि हुने आचार्यले बताए। बाढीले बगाएको मोटरेबल पक्की पुल पुनर्निर्माणका लागि अर्थमन्त्रालयले गत वर्षको चैतमा ३५ करोड बजेट सुनिश्चित गरेको थियो। नेपाल कम्युनिष्ट पार्टी (एमाले)का केन्द्रीय सदस्य विशाल भट्टराईले यो जानकारी दिएका हुन्। तर, अहिलेसम्म कुनै प्रक्रिया अगाडि बढेको छैन।
