सप्तरीका अजयकुमार यादवसँग ३ लाख रुपैयाँ ठगी गर्न खोज्ने म्यानपावर एजेन्ट रंगेहात पक्राउ परेका छन्।
सरकारको ‘फ्रि भिसा फ्रि टिकट’ नीति अन्तर्गत मलेसियामा सेक्युरिटी गार्डको काममा १० हजार रुपैयाँ मात्र लाग्छ।
कोटेश्वरस्थित ‘ग्रान्ड स्वीट जब’ नामक म्यानपावर कम्पनीका एजेन्टले यादवसँग ३ लाख रुपैयाँ माग गरेका थिए।
पीडित यादवले यसअघि नै ७० हजार रुपैयाँ बुझाइसकेका थिए।
म्यानपावरले बाँकी २ लाख २० हजार रुपैयाँ नतिरेसम्म राहदानी, श्रम स्वीकृति र हवाई टिकट रोकेको थियो।
त्यसपछि यादवले श्रम मन्त्री रामजी यादवको सचिवालयमा सम्पर्क गरे।
अजयकुमार यादव मन्त्री रामजी यादवकै निर्वाचन क्षेत्रका मतदाता हुन्।
मन्त्री यादवका स्वकीय उपसचिव सरोज यादव अजयको समस्या समाधानमा खटिए।
उनले सञ्चारकर्मीसहित तीनकुने प्रहरी वृत्त पुगेर अधिकारीहरूसँग समन्वय गरे।
एजेन्टलाई रंगेहात पक्राउ गर्ने योजना बनाइयो।
शनिबार बिहान म्यानपावरका कर्मचारीले अजयलाई फोन गरे।
उनले गैरीगाउँस्थित पेट्रोलपम्प अगाडि पैसा लिएर आउन बोलाए।
पैसा लिने क्रममा प्रहरीले ती कर्मचारीलाई नियन्त्रणमा लियो।
पक्राउ परेका एजेन्टले ३ लाख रुपैयाँ मागेको स्वीकार गरे।
तीनकुने प्रहरीले उनलाई काठमाडौं उपत्यका अपराध अनुसन्धान कार्यालय पुर्यायो।
एजेन्टको साथबाट अजयकुमार यादवको राहदानीसहित चारवटा राहदानी, फ्लाइट टिकट बरामद भयो।
मन्त्री यादवका स्वकीय उपसचिव सरोज यादवले एक नेपाली ठगिनबाट रोकिएको बताए।
उनले सहयोग गर्ने प्रहरी अधिकारीहरूलाई धन्यवाद दिए।
पीडित अजयकुमार यादवले भने, ‘म्यानपावरले सुरुमा पैसा लाग्दैन भन्यो।
भिसा आएपछि ३ लाख नदिए जान नपाउने भन्दै धम्क्यायो।
गरिबले ऋण काढेर पैसा ल्याउनुपर्ने, यस्तो लुटधन्दा गर्नेलाई कडा कारबाही होस्।’
प्रहरीको सक्रियतामा यादवको राहदानी, श्रम स्वीकृति, बिमा र हवाई टिकट बरामद भयो।
उनलाई कागजात हस्तान्तरण भएपछि आइतबार मलेसिया उड्न पाउने सुनिश्चित भएको छ।
श्रम मन्त्रालयले वैदेशिक रोजगारीमा समस्या परे सिधै मन्त्रालयमा सम्पर्क गर्न अपिल गरेको छ।
पक्राउ परेका एजेन्टमाथि थप कानुनी कारबाहीका लागि अनुसन्धान अगाडि बढेको प्रहरीले जनाएको छ।
