झापाको गौरीगञ्ज गाउँपालिका–१ का वडा सचिव अजयकुमार साह १० हजार रुपैयाँ घुस रकमसहित पक्राउ परेका छन्। अख्तियार दुरुपयोग अनुसन्धान आयोग, इटहरीको टोलीले सेवाग्राहीसँग घुस लिइसकेको अवस्थामा उनलाई नियन्त्रणमा लिएको हो।
साहले सम्बन्ध विच्छेद दर्ता प्रमाणपत्र जारी गर्नका लागि सेवाग्राहीसँग घुस मागेको सूचना अख्तियारमा पुगेको थियो। सोही सूचनाका आधारमा आयोगको टोलीले गोप्य रुपमा अनुसन्धान थालेको थियो।
स्थानीय एक होटलबाट साहलाई घुस रकम लिइसकेको अवस्थामा रंगेहात पक्राउ गरिएको अख्तियारले जनाएको छ। घटनाबारे थप अनुसन्धान भइरहेको छ।
