देशको संघीय राजधानी काठमाडौं पछिल्लो समय युवाको आवेगप्रेरित हिंसाको केन्द्र बन्दै गएको छ।
उदाहरणका लागि, काठमाडौंको कीर्तिपुरमा भएको घटनामा गुल्मीका विपिन घिमिरेमाथि तीन जनाको समूहले खुकुरी प्रहार गर्दा उनको ज्यान गयो। प्रहरीका अनुसार घटनामा संलग्न व्यक्तिहरू पहिले पनि आपराधिक गतिविधिमा संलग्न थिए र उनीहरूको खोजी भइरहेको छ।
यस्तै, ललितपुरको मंगलबजारमा सुमित नेम्वाङ र उनका भाइ सृजन नेम्वाङको ज्यान जाने गरी भएको घटना पनि गलत नम्बरमा भएको फोन संवाद र गालीगलौजबाट शुरू भएको थियो। मुख्य आरोपी सञ्जीव नेपालीले प्रहरीसमक्ष दिएको बयानमा फोनमा गाली गरेपछि आफू रिसाएको र सुरक्षाका लागि फलामको नक तथा मासु काट्ने छुरा बोकेर पुगेको बताएका छन्।
ग्याङ कल्चर र मानसिक दबाबले युवा हिंसा बढाउँदै
यी घटनाले युवामा बढ्दो आक्रोश, अहंकार र हिंसात्मक मानसिकता उजागर गरेको छ। ‘हामी डन हौँ’ भन्ने सोच र सामाजिक सञ्जालमा फैलिएको ‘ग्याङ कल्चर’ले धेरै युवाको सोचमा नकारात्मक प्रभाव पारिरहेको छ। मनोविद् गोपाल ढकालका अनुसार अहिलेका युवा अत्यधिक मानसिक दबाबमा छन्।
बेरोजगारी, पारिवारिक तनाव, सामाजिक असन्तुलन तथा सामाजिक सञ्जालको नकारात्मक प्रभावले युवामा आक्रोश बढिरहेको उनको भनाइ छ। पहिले सामान्य विवाद शब्दमै सीमित हुने गरे पनि अहिले त्यसले छुरा, खुकुरी र समूहगत हिंसाको रूप लिन थालेको छ। लागुऔषध सेवन, मदिरा तथा अस्वस्थ मित्रताको प्रभावले युवाको निर्णय क्षमता कमजोर बन्दै गएको छ।
सामान्य विवाद र क्षणिक आवेगकै कारण ज्यान जाने घटना बढ्दै जाँदा प्रश्न केवल प्रहरी प्रशासनको मात्र नभई समग्र समाजकै बन्न पुगेको छ।
