सिंहदरबारमा निर्माणाधीन नयाँ संसद् भवनको सभाहलको डिजाइनमाथि सांसदहरूले प्रश्न उठाएका छन्।
नेकपा (एमाले) का सांसद ऐन महरले सभाहलका सिट फिल्म हलजस्तो र टेबल स्कुलको कक्षा कोठाजस्तो देखिएको भन्दै आपत्ति जनाएका छन्। बुधबार प्रतिनिधि सभाको आकस्मिक समयमा बोल्दै उनले सभाहलको डिजाइन संसद्को गरिमा सुहाउँदो नभएको टिप्पणी गरे।
“सभामुखज्यूले अस्ति निरीक्षण गर्दै गर्दा हामीले एउटा भिडियो देख्यौं। सभामुखज्यूले यो भएन, त्यो भएन भनिरहनुभएको थियो। म त्यसप्रति सम्मान र समर्थन व्यक्त गर्न चाहन्छु। त्यो सभाहल प्रतिनिधि सभाको हल हो, त्यहाँ सांसदहरू फिल्म हेर्न आएका होइनन्,” सांसद महरले भने। उनले हलको डिजाइन प्रतिनिधि सभाको गरिमामय हलजस्तो नभई फिल्म हलजस्तो बनाउने प्रयास गरिएको आरोप लगाए।
यसैबीच, राष्ट्रिय स्वतन्त्र पार्टी (रास्वपा) की सांसद निशा डाँगीले नयाँ संसद् भवनमा प्रयोग गरिएको काठ स्वदेशी हो वा विदेशी भन्ने प्रश्न उठाएकी छिन्।
सरकारले आगामी जेठ १५ गते नयाँ बजेट यसै भवनबाट प्रस्तुत गर्ने तयारी गरिरहेको छ। यस सन्दर्भमा सांसद महरको यो असन्तुष्टिले भवनको तयारी र डिजाइनमाथि प्रश्नचिह्न खडा गरेको छ।
