सप्तरीको भेटनरी अस्पताल तथा पशु सेवा विज्ञ केन्द्र, राजविराजका कार्यालय प्रमुख डा. रामपवित्र दास र हलुका सवारीचालक भोगेन्द्र यादवविरुद्ध अख्तियार दुरुपयोग अनुसन्धान आयोगले विशेष अदालत काठमाडौंमा भ्रष्टाचार मुद्दा दायर गरेको छ।
भ्याक्सिनेटरहरूलाई दिनुपर्ने भुक्तानी रकमको २० प्रतिशत कमिसनबापत घुस माग गरेको सूचनाका आधारमा आयोगको टोलीले दुवैलाई रु एक लाख ३२ हजार ३५० घुस रकमसहित नियन्त्रणमा लिएको थियो।
कार्यालय प्रमुख दासले सवारीचालक यादवसँगको मिलेमतोमा भुक्तानी रकमको कम्तीमा २० प्रतिशत घुस माग गरी बार्गेनिङ गरेको र घुस बुझाउन बाध्य पारेको अवस्थामा दुवै जनालाई रंगेहात पक्राउ गरिएको आयोगका प्रवक्ता सुरेश न्यौपानेले जानकारी दिए।
आयोगको इटहरी कार्यालयबाट खटिएको टोलीले उनीहरूलाई घुस रकमसहित नियन्त्रणमा लिएको थियो।
आयोगले दुवै जनामाथि भ्रष्टाचार निवारण ऐन, २०५९ को दफा ३ को उपदफा (१) को देहाय (ग) बमोजिम कैद र बिगोबमोजिम जरिवानाको मागदाबी गरेको छ।
