इलामको रोङ गाउँपालिकाले प्रमुख प्रशासकीय भवन निर्माणको जिम्मा पाएको नमुना कन्स्ट्रक्सन प्रा.लि.सँगको ठेक्का सम्झौता रद्द गरेको छ। कम्पनीले सम्झौताअनुसार काम सम्पन्न नगरेपछि गाउँपालिकाले यो निर्णय लिएको हो।
गाउँ कार्यपालिकाको कार्यालय र विराटनगर, मोरङस्थित नमुना कन्स्ट्रक्सन प्रा.लि. बीच २०७८ मङ्सिर १७ गते भवन निर्माणका लागि सम्झौता भएको थियो। पटकपटक म्याद थप गर्दा पनि निर्माण सम्पन्न नभएपछि अन्तिम म्याद २०८२ पुस १५ गते सकिएको थियो।
म्याद सकिएको २०० दिन बितिसक्दा पनि कम्पनीले काम अघि नबढाएको गाउँपालिकाले जनाएको छ। लिखित तथा मौखिक ताकेता गर्दा पनि कम्पनीले ठेक्का सम्झौताको सर्तअनुसार दायित्व पूरा नगरेको गाउँपालिकाको भनाइ छ।
सार्वजनिक खरिद ऐन, २०६३ को दफा ५९ (२) (क) र नियम १२१ (ग) लाई आधार मान्दै गाउँपालिकाले कानुनी प्रक्रिया अघि बढाएको हो। गाउँ कार्यपालिकाको २०८३ भदौ ५ गतेको बैठकले सम्झौता रद्द गर्ने निर्णय गरेको थियो। गाउँपालिकाले मंगलबार एक सूचनामार्फत यो जानकारी सार्वजनिक गरेको छ।
