ताजा अपडेट: बूढीगण्डकी बाढी: ५ जना बेपत्ता, प्रधानमन्त्रीद्वारा ४३७ सुरक्षाकर्मी परिचालन
गोरखाको बूढीगण्डकी नदीमा आएको बाढीले ४५ घरमा पूर्ण क्षति पुर्याएको छ भने पाँच जना अझै बेपत्ता छन्। आइतबार बिहान लेदोसहित आएको बाढीमा परी ४८ जनाको सकुशल उद्धार गरिएको नेपाल प्रहरीले जनाएको छ।
बाढीले २७ घरमा आंशिक क्षति पुर्याएको राष्ट्रिय विपद् जोखिम न्यूनीकरण तथा व्यवस्थापन प्राधिकरणले बताएको छ। दुई पक्की पुल, दुई झोलुङ्गे पुल बगेका छन् भने तीन झोलुङ्गे पुल, तीन जलविद्युत आयोजना र चार हवन कुण्डमा क्षति पुगेको छ।
बाढीले ३४ गोठ र तीन सवारीसाधनमा पनि क्षति पुर्याएको छ। बेपत्ता पाँच जनाको खोजी तथा प्रभावितको राहत र उद्धारका लागि ५३८ जना प्रहरी परिचालन गरिएको छ।
गृहमन्त्री सुधन गुरुङले बाढीपीडितको उद्धार र राहतमा सरकार सक्रिय रहेको बताएका छन्। राष्ट्रिय विपद् जोखिम न्यूनीकरण तथा व्यवस्थापन प्राधिकरणसँगको बैठकपछि उनले राहत सामग्रीसहित उद्धारका कामहरू भइरहेको जानकारी दिए।
बाढीले जलविद्युत आयोजनाहरूमा क्षति पुगेकाले हाल सोलार र टेलिफोन जडान गर्ने काम भइरहेको गुरुङले बताए। प्रभावित क्षेत्रमा ५० टेन्ट, ५० त्रिपाल, २०० म्याट्रेस, २०० ब्लांकेट, २०० स्लिपिङ ब्याग, १०० सोलार लाइट, १० जेनरेटर, १३२० ज्याकेट, २० हाइजिन किट, ९० फुड बास्केट, १० बेबी बास्केट र २० रोयल ब्याग सरकारले पठाएको प्राधिकरणले जनाएको छ।
बूढीगण्डकी नदीको जलस्तर आइतबार बिहान ९:४५ बजे अर्घट मापन केन्द्रमा ८.४३ मिटर पुगेको थियो। यस क्षेत्रमा ४.५ मिटरलाई सतर्कता र ५ मिटरलाई खतराको स्तर मानिन्छ।
बाढीका कारण चुमनुब्री गाउँपालिकाका जगत बगर, सल्लेरी र घट्टिखोला क्षेत्रका ३५ देखि ४० घर बगेको अनुमान छ। धार्चे गाउँपालिका-५, माछिखोलाको तल्लो बस्तीका ५ देखि ७ घर र अस्थायी आश्रयस्थल डुबानमा परेका छन्। मनास्लु पदयात्रा मार्ग पनि पूर्ण रूपमा अवरुद्ध भएको छ।
यसअघि: बुढीगण्डकी बाढी: सहायक नदी थुनिएर फुटेको प्रारम्भिक अनुमान, ५ जना बेपत्ता
