२०८३ कात्तिक १८ गते बसेको मन्त्रिपरिषद् बैठकले नेपाल प्रहरीका अतिरिक्त महानिरीक्षक (एआईजी) मनोज केसीलाई प्रहरी महानिरीक्षक (आईजीपी) पदमा नियुक्त गर्ने निर्णय गरेको छ।
मन्त्रिपरिषद् स्रोतका अनुसार, केसीको नियुक्तसँगै हालका आईजीपी दानबहादुर कार्कीलाई प्रधानमन्त्रीको विशेष सुरक्षा सल्लाहकारको जिम्मेवारी दिइएको छ। केसी हाल नेपाल प्रहरीको अपराध अनुसन्धान विभाग प्रमुख छन्।
प्रहरी नेतृत्वमा विगतका फेरबदल
प्रहरी नेतृत्वमा यसअघि पनि यस्ता फेरबदल भएका उदाहरण छन्। सरकारले अच्युत कृष्ण खरेललाई आईजीपीबाट हटाएर राष्ट्रिय अनुसन्धान विभागमा सरुवा गरेको थियो तर उनी त्यहाँ हाजिर हुन गएनन्। दरबन्दी नै नभएको ठाउँमा सरुवा गरेको भन्दै खरेल सर्वोच्च अदालत गएका थिए।
सर्वोच्चबाट मुद्दा जितेपछि खरेल पुनः आईजीपी भएका थिए। त्यसअघि खरेललाई हटाएर सरकारले ध्रुवबहादुर प्रधानलाई आईजीपी बनाएको थियो। खरेलको पुनर्वहालीपछि प्रधानलाई प्रधानमन्त्रीको विशेष सुरक्षा सल्लाहकारमा सरुवा गरिएको थियो।
यसैगरी, रमेश चन्द ठकुरीलाई पनि सरकारले सुरक्षा सल्लाहकारमा सरुवा गरेको थियो। सुडान घोटाला काण्डमा मुछिएको भन्दै उनलाई सुरक्षा सल्लाहकारमा सरुवा गरेर रवीन्द्र प्रताप शाहलाई आईजीपी बनाइएको थियो।
