नेपाल प्रिमियर लिग (एनपीएल) २०२६ अन्तर्गत आज साँझ ५ बजे टीयू अन्तर्राष्ट्रिय क्रिकेट मैदान, कीर्तिपुरमा करण केसीको कप्तानीमा रहेको काठमाडौं गुर्खाज र सन्दीप लामिछानेको कप्तानीमा रहेको विराटनगर किंग्सबीच प्रतिस्पर्धा हुँदैछ। यो प्रतियोगिताको १५औँ खेल हो।
काठमाडौं गुर्खाजले यो सिजनमा हालसम्म २ खेल खेलेको छ। गुर्खाजले जनकपुर बोल्ट्ससँग हार बेहोरेको थियो भने कर्णाली याक्सविरुद्ध ४ विकेटको रोमाञ्चक जित दर्ता गरेको थियो। २ खेलबाट २ अंकसहित टोली अंक तालिकाको सातौँ स्थानमा छ।
उता, विराटनगर किंग्सले भने सिजनमा ४ खेल खेलिसकेको छ। किंग्सले चितवन राइनोज र कर्णाली याक्ससँग हार बेहोरेको छ भने सुदूरपश्चिम रोयल्सलाई ३५ रनले र जनकपुर बोल्ट्सलाई २ रनले पराजित गरेको छ। ४ खेलबाट ४ अंक जोडेर विराटनगर किंग्स अंक तालिकाको दोस्रो स्थानमा छ।
आजको खेल दुवै टोलीका लागि महत्त्वपूर्ण छ। काठमाडौं गुर्खाज अंक तालिकामा माथि उक्लने प्रयासमा हुनेछ भने विराटनगर किंग्स शीर्ष स्थानमा पुग्ने लक्ष्यका साथ मैदानमा उत्रनेछ।
