भीमफेदी दुर्घटना: सर्लाहीका १३ मृतकको शव बुझ्न परिवार सहमत, सामूहिक अन्त्येष्टिको तयारी

मकवानपुरको भीमफेदीमा हायस दुर्घटनामा ज्यान गुमाएका सर्लाहीको चक्रघट्टा गाउँपालिका-४ सुन्दरपुर टोलका १३ जनाको शव परिवारले बुझ्न सहमत भएका छन्। सरोकारवाला पक्ष र पीडित परिवारबीच सहमति भएपछि शव बुझ्ने प्रक्रिया सुरु भएको छ।

चक्रघट्टा गाउँपालिकाका अध्यक्ष कृष्णकुमार यादवका अनुसार, दुर्घटनाका जिम्मेवार पक्षलाई कानुनी कारबाही गर्ने सहमति भएको छ। यसैगरी, अभिभावक गुमाएका बालबालिकाको शिक्षा र पालनपोषणको जिम्मेवारी राज्यले लिने कुरामा पनि सहमति भएको छ।

अध्यक्ष यादवका अनुसार, गाडीधनी र बीमा कम्पनीबाट आउने क्षतिपूर्ति रकमबाहेक थप आर्थिक सहयोग दिने विषयमा पनि सहमति भएको छ। सहमति भएसँगै परिवारका सदस्यहरू केही बेरमा शव लिएर सर्लाही फर्कने तयारीमा छन्। सबै १३ जनाको शव गाउँमा पुर्‍याएपछि सामूहिक अन्त्येष्टि गर्ने योजना छ।

यस घटनाले चक्रघट्टा गाउँपालिकाको सुन्दरपुर टोल नै शोकमग्न बनेको छ। बिहीबार २०८३ कात्तिक २६ गते बिहान काठमाडौंबाट सर्लाहीतर्फ छठ पर्व मनाउन घर फर्किँदै गरेका यात्रुहरू बोकेको मधेश प्रदेश ०३-००१ ज ०८८० नम्बरको हायस मकवानपुरको भीमफेदी गाउँपालिका-६ चिसापानीगढीमा दुर्घटनामा परेपछि गाउँका १३ जनाको ज्यान गएको थियो। दुर्घटनामा चालकसहित १४ जनाको मृत्यु भएको थियो भने ६ जना घाइते भएका थिए।

मधेश सरकारको राहत र प्रदेशसभा बैठक

मधेश प्रदेश सरकारले दुर्घटनामा ज्यान गुमाएका १४ जनाका परिवारलाई प्रतिव्यक्ति १ लाख रुपैयाँका दरले राहत दिने निर्णय गरेको छ। मधेश प्रदेशका स्वास्थ्य तथा जनसंख्या मन्त्री नागेन्द्र साहले प्रदेश मन्त्रिपरिषद्को शुक्रबार बसेको बैठकले यो निर्णय गरेको जानकारी दिए। यसअघि चक्रघट्टा गाउँपालिकाले मृतकका परिवारलाई जनही ५० हजार रुपैयाँ आर्थिक सहयोग उपलब्ध गराउने निर्णय गरेको थियो। गाउँपालिकाले शुक्रबार २०८३ कात्तिक २७ गते शोक बिदा पनि दिएको थियो।

दुर्घटनामा घाइते भएकाहरूको उपचार प्रदेशिक अस्पतालमा निःशुल्क गराउने व्यवस्था मिलाउने निर्णय पनि मधेश प्रदेश सरकारले गरेको छ। घाइतेमध्ये ३ जना उपचारपछि डिस्चार्ज भइसकेका छन् भने अन्य ३ जनालाई थप उपचारका लागि काठमाडौंको मेडिसिटी अस्पताल र भरतपुरको मनकामना अस्पतालमा रिफर गरिएको छ।

यसैबीच, मधेश प्रदेशसभाको बैठक २०८३ कात्तिक २८ गते शनिबार दिउँसो १ बजे बस्ने तय भएको छ। मुख्यमन्त्री कृष्णप्रसाद यादवले विश्वासको मत लिने प्रयोजनका लागि प्रदेशसभाको बैठक आह्वान गरिएको हो। प्रदेशसभा बैठक सञ्चालनका लागि शुक्रबार दिउँसो कार्य व्यवस्था परामर्श समितिको बैठक बस्ने र सोही बैठकले कार्यसूची निर्धारण गर्ने सभामुख रामअशिष यादवले जानकारी दिएका छन्।

यसअघि: भीमफेदी दुर्घटनामा १४ जनाको मृत्यु, एकै परिवारका ६ जनासहित सर्लाहीका सुन्दरपुर गाउँ शोकमा