सर्लाहीको बागमती नगरभित्रका सुकुमबासीको प्रदर्शनलाई सम्बोधन गर्दै नेपाली कम्युनिस्ट पार्टी (नेकपा)का नेता एवं पूर्व गृहमन्त्री नारायणकाजी श्रेष्ठले सरकारले उनीहरूलाई मान्छेजस्तो व्यवहार नगरेको र निरङ्कुशता लाद्न खोजेको आरोप लगाएका छन्।
श्रेष्ठले सुकुमबासीहरूलाई सम्बोधन गर्दै भने, ‘सुकुमबासी मान्छे होइनन्, नागरिक होइनन् भन्नेलाई तिमी पनि सरकार होइनौँ भनेर सुकुमबासीले भन्न सक्नुपर्छ।’ उनले सुकुमबासीलाई आफू बसिरहेको ठाउँबाट हटाउने काम गैरकानुनी भएको स्पष्ट पारे। उनले सबै सुकुमबासीलाई सरकारविरुद्ध प्रतिरोध अभियान चलाउन आग्रह गर्दै सत्य र न्याय तत्काल कमजोर देखिए पनि अन्तमा विजय सत्यकै हुने उनको विश्वास व्यक्त गरे।
वैकल्पिक पुनर्वासको बहाना र निरङ्कुश सत्ताको उदय
सरकारले वैकल्पिक पुनर्वासको कुरा गर्नु उचित नभएको उल्लेख गर्दै श्रेष्ठले अति संवेदनशील क्षेत्रको संरक्षण गर्नुपर्ने अवस्थामा बाहेक अव्यवस्थित, भूमिहीन, सुकुमबासीलाई खनिखोस्री गरेको सिमित जमिन दिन सरकारले बहाना बनाउनु नहुने बताएका छन्। श्रेष्ठले सबैजसो निरङ्कुश सत्ता निर्वाचनबाटै उदाउने गरेको विश्वव्यापी दृष्टान्त रहेको उल्लेख गर्दै जनविश्वासलाई अवमूल्यन गरेर अगाडि बढ्ने निरङ्कुश सत्तालाई आधुनिक विश्वले स्वीकार नगर्ने बताए।
