वीरगञ्जका तीन क्यासिनोबाट अनधिकृत प्रवेश गरी जुवातास खेलेको आरोपमा ६ जना पक्राउ परेका छन्।
पक्राउ पर्नेमा पाँच भारतीय नागरिक छन्। उनीहरू भारतको विहार राज्यका गणेश कुमार, सन्दीप कुमार, सुरज प्रसाद, अल्लाह यादव र ओमप्रकाश यादव हुन्। वीरगञ्ज महानगरपालिका—३२ का जमुदिन मियाँ अन्सारी पनि पक्राउ परेका छन्।
प्रवक्ता हरिबहादुर बस्नेतका अनुसार शनिबार विशेष सूचनाका आधारमा उनीहरू पक्राउ परेका हुन्।
जिल्ला प्रहरी कार्यालय र वडा प्रहरी कार्यालय बिर्ताको संयुक्त टोली खटिएको थियो। टोलीले किङ्स क्यासिनो, फर्चुन सिटि गेमिङ क्लब र क्यासिनो माजोङबाट उनीहरूलाई पक्राउ गर्यो। उनीहरू जुवातास खेलिरहेको अवस्थामा भेटिएका थिए।
पक्राउ परेकाहरूका साथबाट केही रकम र दुई वटा मोबाइलसमेत बरामद भएको छ। उनीहरूमाथि आवश्यक अनुसन्धान भइरहेको प्रवक्ता बस्नेतले बताए।
