नेपालका लागि रुसी महासङ्घका आवासीय राजदूत एलेक्सी भ्लादिमिरोविच सुरोभत्सेभले उपराष्ट्रपति रामसहायप्रसाद यादवसँग भेटवार्ता गरेका छन्। लैनचौरस्थित उपराष्ट्रपतिको कार्यालयमा भएको शिष्टाचार भेटमा द्विपक्षीय सम्बन्धका विविध पक्षमा छलफल भएको थियो।
उपराष्ट्रपति यादवले सन् १९५६ मा कूटनीतिक सम्बन्ध स्थापना भएदेखि नै नेपाल र रुसबीच मैत्रीपूर्ण सम्बन्ध रहेको स्मरण गरे। उनले यस वर्ष सम्बन्धको ७०औँ वर्षगाँठ पुगेको अवसरमा खुसी व्यक्त गरे। मानव संसाधन विकास, पर्यटन, औद्योगिक तथा यातायात पूर्वाधारमा सोभियत सङ्घ कालदेखि नै रुसले गरेको सहयोग प्रशंसनीय रहेको उनले बताए।
उपराष्ट्रपतिले दुई देशबीच बढ्दो सांस्कृतिक र जनस्तरको आदानप्रदानप्रति नेपालले प्रसन्नता व्यक्त गरे। उनले आगामी दिनमा सम्बन्ध अझ सुदृढ हुने विश्वास व्यक्त गरे। उनले रुसी जनताको सुख, शान्ति र समृद्धिका लागि शुभकामना पनि दिए।
रुसी राजदूत सुरोभत्सेभले नेपाल–रुस सम्बन्धलाई थप बलियो बनाउन निरन्तर सहयोग गर्ने प्रतिबद्धता जनाए। उनले रुस सरकार नेपाललाई जलविद्युत, कृषि, चिकित्सा र भौतिक पूर्वाधारका क्षेत्रमा थप सहयोग गर्न इच्छुक रहेको जानकारी दिए।
राजदूत सुरोभत्सेभले नेपाल सरकारबाट औपचारिक अनुरोध र आवश्यक सूची प्राप्त भएमा वीरगन्ज चिनी कारखाना र जनकपुर चुरोट कारखानालाई पुनः सञ्चालनयोग्य बनाउन रुसी पक्ष पूर्ण रूपमा तयार रहेको स्पष्ट पारे।
