जनकपुरधाम । १५ करोडको सरकारी जग्गा माफियाले कब्जा गरेको खुलासा भएको छ। मधेस प्रदेशका गृहमन्त्री फकिरा महतो आफैँ फिल्डमा उत्रिएर ३ महिनाअघि जनकपुरका सडकपेटी र फुटपाथ अतिक्रमणमुक्त गराएका थिए। उनी व्यापार गर्नेहरूमाथि आक्रामक प्रस्तुत भएका थिए।
प्रहरी सक्रिय भएपछि कतिपयले आफैँ क्षेत्र खाली गरे। जानकी मन्दिर, अस्पताल रोड, रामानन्द चोक, शिव चोक, जनक चोक, पिडारी चोक सफा भए। यसले धार्मिक पर्यटक, विद्यार्थी र सर्वसाधारणलाई सहज भयो।
तर, तीन महिना नबित्दै जनकपुरका फुटपाथ पुनः पुरानै अवस्थामा फर्किएका छन्। रामानन्द चोकदेखि जानकी मन्दिर जाने मूल बाटोमै रहेको प्रादेशिक अस्पताल क्षेत्र सडकको आधा भाग फलफूल, तरकारीका ठेलाले ढाकिएको छ। यसले पैदल यात्रुलाई समस्या छ। सडकको व्यस्तता झनै बढेको छ।
अस्पताल रोडमा दर्जनौँ चार पाङ्ग्रे ठेला बिहानदेखि रातिसम्म राखिन्छन्। यसले पैदल यात्रु र सवारीसाधन दुवैलाई सास्ती भएको छ।
ईरिक्सा चालक रामलाल पासवान भन्छन्, ‘मन्त्री आफैँ लागेपछि राम्रो भएको कामलाई निरन्तरता दिन नसक्नु उनको कार्यक्षमतामाथि प्रश्न हो।’
एक सरकारी कर्मचारी भन्छन्, ‘मधेसको कमजोर पक्ष कामलाई निरन्तरता नदिनु हो। आफूलाई अब्बल देखाउन स्टन्टबाजी गर्ने, पछि निरन्तरता दिन नसक्ने मुख्य समस्या हो।’
जनकपुर रेल्वे स्टेशनका बब्लु गुप्ता भन्छन्, ‘आफैँले गरेका निर्णयलाई सरकारले निरन्तरता दिन नसक्नु अनौठो छ।’
मधेस प्रदेश सरकारका प्रवक्ता राधेशंकर प्रसाद पाल भन्छन्, ‘मन्त्रीको काममा जनकपुर उपमहानगरपालिकाका मेयरले सहयोग गरेनन्। असहयोगले सडक व्यवस्थापनमा अवरोध भयो।’ स्थानीय तहले कानुनी अड्चन देखाउँदै असहयोग गर्दा मन्त्रीले निरन्तरता दिन नसकेको उनको भनाइ छ।
जनकपुरलाई पर्यटकीय नगरी बनाउने लक्ष्य छ। प्रदेश र स्थानीय तहले कार्यक्रम अगाडि बढाएका छन्। तर, आपसी समन्वयको अभावले जनताले सास्ती भोग्नुपरेको स्थानीयबासीको बुझाइ छ।
