विराटनगर । कोशी प्रदेश सरकारको मन्त्रिपरिषद् बैठकले तीन महत्त्वपूर्ण निर्णय गरेको छ। सरकारका प्रवक्ता तथा आन्तरिक मामिला तथा कानुनमन्त्री इन्द्रमणि पराजुलीले निर्देशिका र कार्यविधि स्वीकृत भएको जानकारी दिए।
बैठकले ‘ग्रामीण सडक सञ्जाल सुधार आयोजना अतिरिक्त लगानीको कारण प्रभावित संरचना घरटहरा तथा भौतिक सम्पत्तिको क्षतिपूर्ति निर्धारण तथा वितरण निर्देशिका, २०८३’ स्वीकृत गरेको छ। यसले आयोजना लगानीबाट प्रभावित घरटहरा र भौतिक सम्पत्तिको क्षतिपूर्ति निर्धारणको बाटो खोलेको छ।
त्यसैगरी, ‘सार्वजनिक खरिद नियमावली–२०८३’ स्वीकृत भएको छ। यसले प्रदेश सरकारको खरिद प्रक्रियालाई व्यवस्थित गर्नेछ। कानुन, न्याय तथा प्रदेश मामिला समितिबाट परिमार्जित ‘म अघि बढ्छु’ कार्यक्रम कार्यान्वयन कार्यविधि–२०८३ पनि स्वीकृत गरिएको छ।
