विदेशी मुद्रा सञ्चिति ३९ खर्ब ४६ अर्ब २३ करोड रुपैयाँ पुगेको छ। नेपाल राष्ट्र बैंकले सार्वजनिक गरेको तथ्यांकअनुसार यो अघिल्लो आर्थिक वर्षको असार मसान्तको तुलनामा १.२ प्रतिशतले बढी हो।
असार मसान्तसम्म ३८ खर्ब ९७ अर्ब ६७ करोड रहेको कुल विदेशी विनिमय सञ्चिति साउनमा बढेको हो। कुल सञ्चितिमध्ये ३५ खर्ब १७ अर्ब ९९ करोड राष्ट्र बैंकमा छ। बैंक तथा वित्तीय संस्थासँग ४ खर्ब २८ अर्ब २२ करोड मौज्दात छ।
हालको सञ्चितिले २१ महिना ८ दिनको वस्तु आयात धान्छ। यो १८ महिना ८ दिनको वस्तु तथा सेवा आयात धान्न पर्याप्त हुने राष्ट्र बैंकले जनाएको छ।
साउनमा विप्रेषण आप्रवाह २१.२ प्रतिशतले बढेर दुई खर्ब १५ अर्ब पाँच करोड रुपैयाँ भित्रियो। अमेरिकी डलरमा विप्रेषण आप्रवाह १०.२ प्रतिशतले बढेर एक अर्ब ४० करोड पुगेको छ।
यस अवधिमा वैदेशिक रोजगारीका लागि ४२ हजार ६९३ ले अन्तिम श्रम स्वीकृति लिए। पुनः श्रम स्वीकृति लिनेको संख्या २७ हजार ७४८ थियो। साउनमा खुद द्वितीय आय दुई खर्ब २९ अर्ब ९८ करोड पुगेको छ।
