परराष्ट्रमन्त्री शिशिर खनाल र अस्ट्रेलियाकी विदेशमन्त्री पेनी वोङबीच बिहीबार अस्ट्रेलियाको मेलबर्नमा उच्चस्तरीय द्विपक्षीय वार्ता सम्पन्न भएको छ। वार्ताका क्रममा अस्ट्रेलियाले नेपालको बाढी राहत तथा प्रारम्भिक पुनःस्थापनाका लागि थप १ करोड ५० लाख अस्ट्रेलियन डलर सहयोग घोषणा गरेको छ।
यो सहयोग अस्ट्रेलियाले यसअघि नेपालमा आएको विनाशकारी बाढीपछि उपलब्ध गराएको १ करोड १० लाख अस्ट्रेलियन डलर सहयोगभन्दा अतिरिक्त हो। परराष्ट्रमन्त्री खनालले अस्ट्रेलियाको सहयोगप्रति आभार व्यक्त गरेका छन्।
वार्तामा दुई देशका विदेशमन्त्रीहरूले नेपाल–अस्ट्रेलिया द्विपक्षीय सम्बन्धको समग्र अवस्थाको समीक्षा गर्दै आपसी हितका विविध विषयमा विचार आदानप्रदान गरे। उनीहरूले साझा लोकतान्त्रिक मूल्यमान्यता, पारस्परिक सम्मान र प्रगाढ जनस्तरको सम्बन्धमा आधारित दुई देशबीचको घनिष्ठ सम्बन्धप्रति सन्तुष्टि व्यक्त गरेका छन्।
मन्त्री खनालले जलवायु परिवर्तन, विपद् पूर्वतयारी, शिक्षा र आर्थिक सहकार्यमा केन्द्रित रहेर दुई देशबीचको सम्बन्ध थप सुदृढ गर्ने विषयमा छलफल गरेका थिए। नेपालले जलवायु परिवर्तनसम्बन्धी विश्वव्यापी मञ्चहरूमा जोखिममा रहेका हिमाली मुलुकका सरोकारलाई प्राथमिकताका साथ उठाउन अस्ट्रेलियासँग आग्रह गरेको छ। अस्ट्रेलियाले कोप–३१ को प्रक्रियाको नेतृत्व गर्न लागेकाले नेपालले यस्तो आग्रह गरेको हो।
यसैगरी, दुई पक्षबीच पूर्वसूचना प्रणाली, विपद् पूर्वतयारी तथा जलवायु अनुकूल पुनर्निर्माणमा सहकार्यका विषयमा पनि छलफल भएको थियो। अस्ट्रेलियामा रहेका नेपाली विद्यार्थीको शिक्षा र कल्याणका विषयमा पनि कुराकानी भएको छ। नेपालले अस्ट्रेलियाको विद्यार्थी भिसासम्बन्धी नीतिमा हालै भएका परिवर्तनका बीच वास्तविक नेपाली विद्यार्थीलाई अनुकूल हुने गरी विचार गर्न आग्रह गरेको छ।
नेपालमा अस्ट्रेलियाबाट मान्यता प्राप्त प्राविधिक तथा व्यावसायिक शिक्षा तथा तालिम (टीभीईटी) संस्था र विश्वविद्यालयका क्याम्पस स्थापना गर्ने विषयमा पनि दुई पक्षबीच छलफल भएको छ।
यसअघि: अस्ट्रेलियाद्वारा नेपाललाई बाढी प्रभावित क्षेत्रका लागि थप १५ मिलियन डलर सहयोग
