मकवानपुरको इन्द्रसरोवर गाउँपालिका–२ सुकौरामा यात्रुवाहक विद्युतीय गाडी दुर्घटनामा चार जनाको मृत्यु भएको छ। चार जना घाइते भएका छन्। मृतकको सनाखत भएको छ।
मृत्यु हुनेमा नवलपरासी (बर्दघाट सुस्तापूर्व) कावासोती–१ का २४ वर्षीय नरबहादुरसिंह ठकुरी, धनुषाधाम नगरपालिका–४ का ४३ वर्षीय सुरज भट्टराई, छिपहरमाई–२ का ४४ वर्षीय भुवनेश्वर साह कानु र परवानीपुर–३ का ३२ वर्षीय सरफरोस मियाँ छन्। शव हेटौँडा अस्पतालमा राखिएको छ।
घाइते चालक बाराको कलैया उपमहानगरपालिका–२४ का करिब २० वर्षीय अमीर अन्सारी, हेटौँडा उपमहानगरपालिका–११ की २३ वर्षीया कल्पना तामाङ र मकवानपुरगढी गाउँपालिका–१ का २३ वर्षीय राजकुमार स्याङ्तानको काठमाडौंस्थित ट्रमा सेन्टरमा उपचार भइरहेको छ।
बाराको महागढीमाई नगरपालिका–११ की २१ वर्षीया बबिया कुमारी यादवको हेटौँडा अस्पतालमा उपचार भइरहेको छ। प्रहरीका अनुसार अन्सारी र स्याङ्तानको अवस्था गम्भीर छ। यादवको अवस्था मध्यम छ।
हेटौँडा अस्पतालमा उपचाररत यादव लोकसेवा आयोगको परीक्षा दिन वीरगञ्जतर्फ जाँदै थिइन्। गाडी सडकबाट करिब एक हजार मिटर तल खसेर पल्टिँदा उनी झ्यालबाट बाहिर निस्कन सफल भइन्।
यादवले दुर्घटनाअघि गाडी तीव्र गतिमा गुडिरहेको बताइन्। प्रहरीले दुर्घटनाको कारणबारे अनुसन्धान गरिरहेको छ। काठमाडौंबाट वीरगञ्जतर्फ जाँदै गरेको मधेस प्रदेश ०३–००१ ज ०७२० नम्बरको इभी दिउँसो करिब २ः०० बजे हेटौँडा–भीमफेदी–कुलेखानी–फाखेल सडकखण्डमा दुर्घटनामा परेको थियो। गाडीमा चालकसहित आठ जना सवार थिए।
