जग्गाको नक्सा संशोधन गरिदिने बहानामा सेवाग्राहीसँग १ लाख रुपैयाँ घुस लिने नापी कार्यालय बर्दिवास, महोत्तरीका सर्वेक्षक शिवकुमार साह पक्राउ परेका छन्। अख्तियार दुरुपयोग अनुसन्धान आयोगको टोलीले उनलाई घुस रकमसहित रंगेहात नियन्त्रणमा लिएको हो।
अख्तियारको बर्दिवास कार्यालयबाट खटिएको टोलीले सर्वेक्षक साहलाई सेवाग्राहीबाट १ लाख रुपैयाँ घुस लिइसकेको अवस्थामा नापी कार्यालयअगाडिको खाजाघरबाट मंगलबार नियन्त्रणमा लिएको थियो। जग्गाको नक्सा संशोधन गरिदिन सेवाग्राहीलाई विभिन्न बहानामा दुःख दिँदै साहले घुस माग गरेको उजुरी अख्तियारमा परेको थियो।
पक्राउ परेका सर्वेक्षक साहविरुद्ध भ्रष्टाचार मुद्दामा अनुसन्धान अघि बढाउन विशेष अदालतबाट बुधबार म्याद थप गरिएको छ। उनीमाथि हिरासतमा राखी थप अनुसन्धान भइरहेको अख्तियारका प्रवक्ता सुरेश न्यौपानेले जानकारी दिए।
