सुनसरी। कोशी प्रदेशका मुख्यमन्त्री हिक्मतकुमार कार्कीले बराहक्षेत्रको धार्मिक पर्यटन प्रवर्द्धनका लागि पूर्वाधार निर्माण प्रदेश सरकारको प्राथमिकतामा रहेको बताएका छन्।
बिहीबार बृहत्तर बराहक्षेत्र विकास समिति चतरा कार्यालयको अवलोकन गर्दै उनले बराहक्षेत्रलाई धार्मिक तथा पर्यटन सर्किटका रूपमा विकास गर्न प्रदेश सरकारले सहयोग गर्ने प्रतिबद्धता जनाए।
“बराहक्षेत्रको धार्मिक महत्वलाई पर्यटनसँग जोडेर पूर्वाधार विकास गर्न सके आन्तरिक तथा बाह्य पर्यटकलाई थप आकर्षित गर्न सकिन्छ,” मुख्यमन्त्री कार्कीले भने। धार्मिक तथा ऐतिहासिक महत्व बोकेको बराहक्षेत्रको समग्र विकासका लागि स्थानीय, प्रदेश र सङ्घीय सरकारबीच समन्वय आवश्यक रहेको उनले उल्लेख गरे।
मुख्यमन्त्री कार्कीले कुम्भ मेलासहितका धार्मिक तथा पर्यटकीय क्षेत्रलाई समेटेर प्रवर्द्धन कार्यक्रम सञ्चालन गरेमा आर्थिक गतिविधि बढ्ने र रोजगारी सिर्जना हुने बताए। यहाँको धार्मिक, सांस्कृतिक र प्राकृतिक महत्व संरक्षण गर्दै योजनाबद्ध पूर्वाधार विकास गर्न प्रदेश सरकार प्रतिबद्ध छ।
