नेपाली कांग्रेसको १५औँ महाधिवेशनमा उम्मेदवारी फिर्ता लिने र सच्याउने समय आज बिहान ९ बजेसम्म तोकिएको छ।
त्यसपछि बिहान १० बजे उम्मेदवारको अन्तिम नामावली प्रकाशन गरिनेछ र दिनभर प्रचारप्रसारका लागि समय उपलब्ध गराइनेछ। महाधिवेशन असोज १८ गतेदेखि काठमाडौंको खुलामञ्चमा सुरु भएको थियो।
यस महाधिवेशनमा कुल ७,११४ जना महाधिवेशन प्रतिनिधि सहभागी छन्। कांग्रेस केन्द्रीय निर्वाचन समितिले असोज १९ गते बेलुका ८:३० बजे मतदाताको अन्तिम नामावली प्रकाशन गरेको थियो।
असोज २० गते बिहान १० बजेदेखि दिउँसो ३ बजेसम्म उम्मेदवारको मनोनयनपत्र दर्ता भएको थियो। सोही दिन बेलुका ७ बजे उम्मेदवारको दोस्रो नामावली प्रकाशन गरिएको थियो।
संशोधित विधानअनुसार नेपाली कांग्रेसको केन्द्रीय कार्यसमिति २९७ सदस्यीय हुनेछ, जसमा पदाधिकारीको संख्या १४ बाट बढाएर २६ पुर्याइएको छ। महाधिवेशनमा मधेशमा पार्टीको गुमेको साख फर्काउने रणनीतिबारे पनि छलफल भइरहेको छ।
मतदान असोज २२ गते बिहान ७ बजेदेखि साँझ ५ बजेसम्म राष्ट्रिय सभागृह, खुलामञ्च र प्रज्ञा भवनमा हुनेछ। मतदान सकिएपछि मतगणना सुरु गरिने निर्वाचन समितिले जनाएको छ।
