काठमाडौं २४ घण्टा सञ्चालनबारे प्रधानमन्त्री कार्यालय र गृह मन्त्रालयसँग छलफल

काठमाडौंलाई २४ घण्टा सञ्चालन गर्ने विषयमा प्रधानमन्त्री कार्यालय र गृह मन्त्रालयसँग काठमाडौं जिल्ला प्रशासन कार्यालयले छलफल गरिरहेको छ। प्रमुख जिल्ला अधिकारी ईश्वरीप्रसाद पौडेलले यस विषयमा उच्चस्तरीय छलफल भइरहेको जानकारी दिएका हुन्।

ठमेल पर्यटन विकास परिषद्ले शुक्रबार आयोजना गरेको शान्ति सुरक्षासम्बन्धी छलफल तथा अन्तर्क्रिया कार्यक्रममा प्रमुख जिल्ला अधिकारी पौडेलले सरकारले ठमेललाई पर्यटकीय केन्द्र बनाउन प्रयास गरिरहेको बताए। उनले गैरकानुनी गतिविधि नियन्त्रणका लागि घरधनी र व्यवसायीको सहयोग आवश्यक रहेकोमा जोड दिए।

सार्वजनिक शौचालय, अव्यवस्थित पार्किङ, फोहोर व्यवस्थापन, ट्राफिक जाम र मगन्तेजस्ता समस्या समाधानका लागि सम्बन्धित निकायसँग सहकार्य भइरहेको काठमाडौं महानगरपालिकाका प्रमुख प्रशासकीय अधिकृत मुक्तिराम अर्यालले जानकारी दिए। ठमेललाई सवारीसाधन निषेधित क्षेत्र बनाउन स्थानीयवासी र व्यवसायी तयार भएमा ट्राफिक प्रहरीले सहयोग गर्ने काठमाडौं उपत्यका ट्राफिक प्रहरी कार्यालयका प्रमुख प्रहरी वरिष्ठ उपरीक्षक सुरेशप्रसाद काफ्लेले बताए। उनले जथाभावी पार्किङ गर्नेलाई कारबाही गरिने चेतावनी पनि दिए।

ठमेललाई सुरक्षित बनाउन घरधनी र व्यवसायीको सहयोग आवश्यक रहेकोमा जिल्ला प्रहरी परिसर काठमाडौंका प्रमुख प्रहरी वरिष्ठ उपरीक्षक दिलीप घिमिरेले जोड दिए। छलफलका क्रममा ठमेल पर्यटन विकास परिषद्का पूर्वअध्यक्ष भविश्वर शर्माले २०८१ वैशाख १ गतेदेखि लागू गरिएको ठमेललाई २४ घण्टा सञ्चालन गर्ने आचारसंहितालाई प्रभावकारी रूपमा कार्यान्वयन गर्नुपर्नेमा जोड दिए।

व्यवसायीका समस्या र सरोकार

छलफलमा सहभागी घरधनी तथा व्यवसायीहरूले रातिको समयमा आवतजावतमा हुने कठिनाइ, लागुऔषध कारोबार तथा सेवन, फोहोर व्यवस्थापन, अव्यवस्थित पार्किङ र ढल निकासको समस्याले सातघुम्ती क्षेत्रमा पानी जम्ने गरेको लगायतका विषयमा सरोकार व्यक्त गरेका थिए। ठमेल पर्यटन विकास परिषद्का अध्यक्ष राजुमान डङ्गोलले ठमेलको पर्यटन विकास र व्यवस्थापनका लागि सरकारी निकाय, स्थानीय, घरधनी तथा व्यवसायीबीच सहकार्य आवश्यक रहेको बताए।

प्रमुख जिल्ला अधिकारी ईश्वरीप्रसाद पौडेलले ठमेलका समस्या र चुनौतीबारे छलफल गरी समाधान खोज्न जिल्ला प्रशासन कार्यालयमा मासिक बैठक गर्ने प्रस्ताव राखेका छन्।